ROTEIRO Camiñando polas terras do Lobishome

O vindeiro domingo 12 de xuño poñemos punto e final ao programa de roteiros As nosas sagradas montañas. Achegarémonos ata o Bidueiral de Montederramo, unha das xoias dos bosques galegos, razón pola que foi declarado Lugar de Interese Comunitario e que ofrece unha diversidade de paisaxes que vai máis aló da masa forestal de bidueiros. Guiarános no percorrido Ramsés Pérez, coordinador da equipa de Educación Ambiental de ADEGA.

Faremos unha ruta circular que aínda sendo de aproximadamente 20 Km a dificultade da mesma é baixa. Comezaremos o ascenso en A Mogaínza, a través dunha pista forestal chegaremos ata o Bidueiral (en azul). O percorrido a través do Bidueiral (en rosa) é circular e voltaremos á mesma pista forestal que nos levará de volta.

• 

• 

A Serra de San Mamede situáse no noroeste do Macizo Central ourensán, considerada a Alta Montaña galega. O LIC Bidueiral de Montederramo é un espazo cunha extensión de 1.984 ha, e a sua altitude vai dende os 959 m. na cota inferior aos 1619 m. na superior, correspondente ao cumio que dá nome á serra, o Alto de San Mamede.

Unha das singularidades que definen este território é a presenza dun dos bosques de bidueiros mellor conservados, ademais de uceiras secas europeas e as uceiras ortomediterráneas endémicas con toxo, os rochedos silíceos con vexetación pioneira do Sedo-Scleranthiobn ou do Dedo albi-veronicion dillenii, as carballeiras galaico-portuguesas con Quercus robur e Quercus pyrenaica e os bosques de Ilex aquifolium.

A fauna atinxe unha ampla comunidade zoolóxica, en especial a asociada ás zonas de montaña, na que habitan aproximadamente unhas 108 especies de aves que visitan a serra en diferentes momentos do ano. Entre esta ornitofauna destaca a maxestuosa aguia real ou as bulideiras picas alpinas, lavercas ou bicotortos. Algúns dos representantes dos mamíferos son o auganeiro, martas, lebres, corzos, cervos, porcos bravos e o lobo.

E falando de lobos e homes… Os camiños do bidueiral foron os
protagonistas das andanzas e fechorías dun dos lobishomes máis famosos de
Galiza, Romasanta. Durante o percorrido, coñeceremos algo máis deste personaxe que parece sacado dunha historia de terror.

c5_bidueiral_de_montederramo_caminhando_polas_terras_de_lobishomeDescarga\t

ROTEIRO A Galiza Estremeira

Podes ver as fotos do roteiro aquí. Continuando co programa de roteiros “As nosas sagradas montañas” o vindeiro domingo 22 de maio, faremos o penúltimo dos percorridos do programa As nosas sagradas montañas.

Este roteiro facémolo en colaboración coa asociación Bierzo Aire Limpo, e levaranos ata Molinaseca, vila moi próxima a Ponferrada, punto de comezo da ruta circular.

A senda levaranos ata “Las Puentes de Malpaso”, onde poderemos desfrutar da multitude de cursos fluviais que hai nesta zona, ríos regos e fervenzas, que xunto ás pontes medievais conforman esta paisaxe de gran beleza.

O camiño de volta a Molinaseca farémolo polo camiño de Santiago francés, e poderemos desfrutar das panorámicas do val.

O percorrido é duns 11Km e de dificultade Baixa, aínda que cun treito de algo de costa. Na seguinte ligazón tes toda a información da ruta.

https://gl.wikiloc.com/rutas-sendeirismo/las-puentes-de-malpaso-molinaseca-las-puentes-de-malpaso-riego-de-ambros-molinaseca-21-01-16-12018532

ROTEIRO O Santuario perdido dos celtas

Podes ver as fotos do roteiro aquí.

O vindeiro 24 de abril imos achegarémonos a Cerdedo, nunha ruta en colaboración coa Asociación Capitán Gosende. Desta volta sairemos de Lugo ás 9h dende Maxisterio. A lonxitude total da ruta é de algo menos de 7Km, e a dificultade é baixa, pois na súa totalidade imos por unha pista de xabre, sempre por riba dos 970m de altitude.

-Punto de encontro: Cerdedo (cafetaría NelRoss) onde poderemos tomar un café antes de comezar a ruta. Dende Cerdedo colleremos o autobús até Chan de Mamas onde comezaremos a ruta dirección a Portalén, dende alí camiñaremos ata a ermida da Santa Mariña. Por recomendación do guía xantaremos no viveiro de Santa Mariña. E dende aquí voltaremos ata a aldea de Cimadevila (Caroi) onde colleremos o autobús de volta.

Percorreremos nun itinerario lineal algunhas das estacións arqueomíticas do monte do Seixo, descubertas tras unha investigación etnográfica levada a cabo a finais dos anos noventa:

Chan de Mamas (necrópole neolítica: a tumba do Tecelán de Carballás); as lagoas de Xestido (lenda da santa Mariña e do pozo da Muller Morta); o Almadraque de Pirocha (tripla manifestación da Moura, deidade primixenia); a Trampa do Lobo (vestixios dun cortello lobeiro); a Cruz do Seixo (antigo e cristianizado ara solis); Portalén (a porta ao Máis Alá); o Marco do Vento (pedrafita de 6 m de alto e 30 m³ de pedra de gran)…

Ao tempo, denunciaremos, coma sempre, a desfeita arqueolóxica e ambiental perpetrada na montaña dende que, en 1999-2000, a cacicaxe de Cerdedo e Forcarei permitisen a instalación dos aeroxeradores eólicos.

ROTEIRO Birileo: dende os Ancares ate o mar

O vindeiro domingo 20 de marzo, visitaremos a zona de Negueira de Muñiz, xunto coa Asociación para o Desenvolvemento de Negueira (ADN).

O bus deixaranos na aldea asturiana de Uria onde comezaremos o ascenso ata o Birileo ou Busbeirón (1286m) dende onde, se o tempo nos acompaña, poderemos contemplar unha gran panorámica dende os Ancares ate a costa cantábrica. No camiño atoparemos alvarizas e curros, e poderemos coñecer os proxectos eólicos que ameazan a zona.

O Birileo está catalogado como o cumio máis alto dos Montes de A Fonsagrada e é o punto de confluencia dos concellos de A Fonsagrada, Negueira de Muñiz e do asturiano Ibías.  

A ruta é circular e conta cun percorrido de algo menos de 18Km cun desnivel de 911m, ten unha dificultade media-baixa.

ROTEIRO Auga de vida, auga sacrificada na Serra do Xistral

Aquí tes as fotos do roteiro.

O vindeiro domingo 20 de febreiro visitaremos a Serra do Xistral. Nun principio tíñamos prevista a andaina polo Cadramón, pero debido a que saíu a exposición pública un proxecto dunha central hidroeléctrica reversíbel ao pé da Serra do Xistral, a petición do colectivo Cultura do País co que coorganizamos este roteiro, cambiamos o percorrido inicial e visitaremos estes terreos afectados dentro da Rede Natura 2000.

Guiaranos neste percorrido Manuel Camba, integrante da platafoma veciñal creada en oposición a este proxecto.