ROTEIRO POLA SERRA DO GALIÑERIO 17 DE XUÑO DE 2012

Rematamos  a campaña de roteiros 2011-2012 nun fermoso lugar: a Serra do
Galiñeiro. Tivemos uns excepcionais guías, integrantes da “plataforma pola
protección da serra do Galiñeiro” que nos tiñan preparado un completo programa.
A idea era que ao longo do día puideramos coñecer parte do amplo patrimonio que
contén esa singular atalaia, á vez que reflexionariamos sobre a necesidade da
súa protección. Debido á unha inoportuna e intensa chuvia non foi posible
desenvolver todo o programa previsto, pero aínda así tivemos a oportunidade
coñecer ese mítico lugar, ao que estamos desexando volver, sen chuvia. Na
seguinte ligazón pódese ler un artigo escrito por Adela Figueroa (Curra) no que
se describe con detalle e sentimento a nosa andaina polo Galiñeiro.

http://mundogaliza.com/a-serra-do-galinheiro-no-sul-da-galiza-uma-fortaleca-a-defender/

Ver máis fotos

ÚLTIMO ROTEIRO DA CAMPAÑA 2011 – 2012

ÚLTIMO ROTEIRO DA CAMPAÑA 2011 – 2012. ANÍMATE A PARTICIPAR

ROTEIRO POLA SERRA DO GALIÑEIRO (ÁREA DE VIGO): 17 DE XUÑO DE 2012

Ver cartel

Consultar información sobre a Serra do Galiñeiro. Elaborada pola plataforma pola protección da Serra do Galiñeiro.

ROTEIRO POLO MONTE PINDO 20-05-2012

Cunha pequena variación sobre o programa prevista, un nutrido grupo de camiñantes subimos ao monte Pindo acompañados dun excelente guía. Grazas a todos/as pola vosa participación. Fotos aportadas por Montse Lombardía.

ROTEIRO POR TOURIÑÁN 22-ABRIL-2012

Iniciamos  o roteiro nas proximidades do santuario da  Virxe de Barca de Muxía onde tentamos abalar, sen moito éxito, a emblemática  pedra. Dende este punto contemplamos o lugar onde está proxectada a construción  dun Parador, o cabo Vilán (onde se ubica a piscifactoría de Stolt Sea Farm) e o  monte Cachelmo,  ao pé do cal está a  furna de Buserán.  Nesta furna rematou ,  segundo a lenda,   o amor e a vida de Florinda e ou seu namorado  Buserán.

A nosa seguinte parada foi o coído de Cuño,  lugar declarado punto de interese xeolóxico. Despois dun descanso para comer  bordeamos  o cabo Touriñán e reflexionamos sobre o impacto que tería a  implantación dunha piscifactoría neste punto tan singular. En todos estes  lugares estivemos acompañados por un excepcional guía (Manuel Vilar) ao que  temos que agradecer as súas interesantes explicacións e a súa boa disposición.

Cando pensabamos que íamos dar por  rematado un exitoso roteiro: fermoso día, excelente guía, e un gran número de  participantes, unha persoa moi asidua a estes roteiros, Suso de Laracha,  propúxonos visitar  dous lugares moi  interesantes do concello de Cabana de Bergantiños:  o castro da Cidá de Borneiro e o dolmen de  Dombate, sen dúbida unha xoia do megalítico galego. Grazas tamén a Suso pola  súa proposta e por servirnos de improvisado guía.

Ver máis fotos aportadas por Daniel Piñeiro

ROTEIRO POR BARREIROS – 25 DE MARZO DE 2012

Un grupo de preto de 60 persoas pasamos un fermoso día por terras de Barreiros. Nesta ocasión contamos coa participación duns 10 estudantes do campus universitario de Lugo de diferentes nacionalidades, polo que consideramos oportuno variar a ruta prevista para a mañá co obxecto de que estes estudantes puideran coñecer un lugar tan emblemático como é a Praia das Catedrais. Tivemos a fortuna de que a hora da nosa visita coincidira coa marea baixa, polo que todos nós gozamos paseando pola area mollada entre castelos de rochas. 

Despois deste relax costeiro continuamos o roteiro cara ao lugar das Eiras. Xantamos preto da capela de Santo Estevo de Ermo e seguimos a ruta por un singular sendeiro cheo de lendas relacionadas coas propiedades terapéuticas das augas que manan entre os seus penedos. Merecen mención a fonte ferruxinosa de Santo Estevo e a fonte de Santa Rosa, así como unha espectacular fervenza. Nestes penedos puidemos apreciar tamén outro elemento moi presente na mitoloxía galega: as pegadas das ferraduras que deixou o cabalo de Santiago na súa fuxida dos mouros.

           

A media tarde subimos ao miradoiro natural do monte Penabor, dende o que gozamos dunha excelente panorámica da franxa costeira de Barreiros-Foz. Dende este miradoiro ollamos tamén o monte Cornería, lugar no que, segundo a lenda, o bispo Maeloc deixou soterrado un diamante azul agochado nun baúl de ouro macizo. Aproveitamos esta fermosa atalaia  para reflexionar sobre a conveniencia dun axeitado planeamento urbanístico para o lugar.

Rematamos a xornada do roteiro tomando un refresco en Rinlo, recordando tamén a ameaza da instalación neste lugar dunha piscifactoría en terreos protexidos.

Ao longo da nosa estancia por Barreiros estivemos acompañados polo noso guía local: Mosquera. Debémoslle agradecer a súa dedicación e amabilidade. Grazas.

Ver máis fotos…